Category Archives: សុខភាព
ម្សៅអង្ករធម្មតាៗក៏អាចជួយឱ្យមុខសស្អាតបែបធម្មជាតិបានដែរ
ដោយសារតែបែបបទជីវិតដ៏មមាញឹក ការបំពុលបរិយាកាស អាការៈស្រេ្តស និងកម្ដៅព្រះអាទិត្យ បានធ្វើឱ្យស្បែកមុខរបស់ស្រីៗយើងខ្មៅស្រអាប់មិនស្រស់ថ្លាទាល់តែសោះ។ មនុស្សស្រីមួយចំនួនធំបានចំណាយប្រាក់កាសអស់ជាច្រើនដើម្បីទិញផលិតផលថ្លៃៗដែលមានដូចជាក្រែមលាបមុខ ឡេ ដែលសុទ្ធសឹងតែមានផ្ទុកសារធាតុគីមីទាំងអស់ដើម្បីព្យាបាលបញ្ហាដែលកើតមានលើផ្ទៃមុខរបស់ពួកគេ។
ថ្ងៃនេះកញ្ញាសូមបង្ហាញពីអាថ៌កំបាំងថែរក្សាផ្ទៃមុខដែលធ្វើឱ្យផ្ទៃមុខភ្លឺថ្លាទន់រលោង និងស្រស់ស្អាត ដោយប្រើប្រាស់ទឹកអង្ករ ឬម្សៅអង្ករ មិនចំណាយប្រាក់កាសច្រើន។
ម្សៅអង្ករមានមុខងារជាក្រែមការពារកម្ដៅថ្ងៃ៖
ម្សៅអង្ករមានផ្ទុកសារធាតុប្រឆាំងអុកស៊ីតកម្មដែលជួយបង្កើនវីតាមីន C ក្នុងរាងកាយ ហើយអង្ករក៏មានផ្ទុកនូវសារធាតុប្រឆាំងការរលាកដែលធ្វើឱ្យស្បែកមុខអាចទប់ទល់នឹងការរលាក ក៏ដូចជាជួយព្យាបាលមុខផងដែរ។
ម្សៅអង្ករ និងទឹកដោះគោសម្រាប់លាបផ្ទៃមុខ៖ ការលាយបញ្ចូលគ្នារវាងម្សៅអង្ករ និងទឹកដោះគោនឹងធ្វើឱ្យផ្ទៃមុខរបស់អ្នកសកាន់តែឆាប់រហ័សជាងមុនទៅទៀត ខណៈដែលទឹកដោះគោមានតួនាទីយ៉ាងសំខាន់ក្នុងការលាងសម្អាតស្បែកមុខ ហើយអាស៊ីតដែលមានក្នុងទឹកដោះគោនឹងជួយធ្វើឱ្យស្បែកមុខរបស់អ្នកភ្លឺថ្លាផងដែរ។
លាយម្សៅអង្ករមួយស្លាព្រាបាយជាមួយនឹងទឹកដោះគោមួយស្លាបព្រាបាយដូចគ្នាដាក់ក្នុងកូនចានតូចមួយ។ លាយល្បាយឱ្យសព្វល្អ កុំឱ្យរាវពេករួចយកទៅបំពកលើផ្ទៃមុខទុករយៈពេលពី២០ ទៅ ៣០ នាទី ឬទុករហូតទាល់តែល្បាយនោះស្ងួតល្អ។ នៅពេលដែលល្បាយស្ងួតល្អហើយ អ្នកអាចលាងសម្អាតជាមួយនឹងទឹកស្អាត រួចជូតមុខឱ្យស្ងួតល្អ។ អ្នកនឹងឃើញភាពខុសប្លែកគ្នានៃស្បែកមុខរបស់អ្នក។ ធ្វើបែបនេះ២ទៅ ៣ ដងក្នុងមួយសប្ដាហ៍ដើម្បីលទ្ធផលកាន់តែប្រសើរថែមឡើង។
ស្ក្រាប់ម្សៅអង្ករ និងទឹកដោះគោសម្រាប់ដងខ្លួន៖
លាយម្សៅអង្ករ និងទឹកដោះគោក្នុងបរិមាណស្មើគ្នា រួចយកមកលាបលើដងខ្លួនទាំងមូល ទុកចោលរយៈពេលប្រហែល ៥ ទៅ១០ នាទីសឹមលាងសម្អាត និងជូតឱ្យស្ងួត។ អនុវត្តបែបនេះឱ្យបានយ៉ាងតិចម្ដងក្នុងមួយសប្ដាហ៍ដើម្បីទទួលបានស្បែកដងខ្លួនសភ្លឺ ម៉ដ្ត រលោងពិតៗ៕
ប្រភព៖ Zeppfeed
វិធីងាយៗដើម្បីទទួលបានបបូរមាត់ពណ៌ផ្កាឈូកដ៏គួរឱ្យចង់ថើប
នារីគ្រប់រូបតែងស្រមៃចង់បានបបូរមាត់ពណ៌ផ្កាឈូកដ៏ទន់រលោងគួរឱ្យទាក់ទាញ ប៉ុន្តែដោយហេតុថាជីវិតមានភាពមមាញឹកពេលខ្លះយើងមិនបានយកចិត្តទុកដាក់លើរឿងនេះឡើយ។ មូលហេតុដែលបណ្ដាលឱ្យបបូរមាត់ប្រែជាខ្មៅស្រអាប់មានដូចជា កម្ដៅថ្ងៃ ការទទួលទានកាហ្វេច្រើន និងអតុល្យភាពនៃអ័រម៉ូនផងដែរ។
កញ្ញា សូមបង្ហាញជូនវិធីសាស្រ្តងាយៗបំផុតដែលមានដូចខាងក្រោម៖
ទឹកឃ្មុំ៖ ទឹកឃ្មុំអាចជួយធ្វើឱ្យបបូរមាត់របស់អ្នកមានសំណើមជាប់ជានិច្ច។ យកទឹកឃ្មុំ ២ ទៅ ៣ តំណក់មកម៉ាស្សាលើបបូរមាត់ស្រាលៗ ទុកចោលរយៈពេល ៥នាទី។
ទឹកផ្លែទទឹម៖ ជ្រលក់សំឡីក្នុងទឹកផ្លែទទឹមរួចលាបលើបបូរមាត់មុនពេលចូលគេង។ វានឹងជួយធ្វើឱ្យបបូរមាត់របស់អ្នកប្រែពណ៌ពីខ្មៅស្រអាប់មកជាផ្កាឈូកព្រឿងៗគួរឱ្យស្រលាញ់។
ទឹកដោះគោ និងស្រទាប់ផ្កាកូឡាប៖ យកទឹកដោះគោចំនួន ១ ស្លាបព្រាកាហ្វេ និងស្រទាប់ផ្កាកូឡាប ២ ទៅ ៣ សន្លឹក។ យកស្លាបព្រាសង្កត់លើស្រទាប់ផ្កាកូឡាបឱ្យចេញពណ៌ផ្កាឈូក រួចយកមកលាបលើបបូរមាត់ទុកចោលរយៈពេល ១០ នាទី។ បន្ទាប់មកលាងសម្អាតជាមួយទឹកក្ដៅឧណ្ហៗជាការស្រេច។
ក្រូចឆ្មារ៖ ក្រូចឆ្មារមានសារធាតុកាត់ឱ្យស និងជួយកម្ចាត់កោសិកាចាស់ៗ។ ច្របាច់ក្រូចឆ្មារមួយចំណិតមកលាបលើបបូរមាត់មុនពេលចូលគេង។ រយៈពេលតែ ១ ខែទៅ ២ ខែយ៉ាងយូរបំផុតអ្នកនឹងឃើញពីភាពខុសប្លែកយ៉ាង។
ស្ករ និងប៊ើ៖ ស្ករអាចជួយកម្ចាត់កោសិកាចាស់ៗដែលងាប់ ខណៈដែលប៊ើជួយធ្វើឱ្យបបូរមាត់មានសំណើម និងរលើបរលោង។ លាយស្ករសចំនួន ២ ស្លាបព្រាកាហ្វេជាមួយនឹងប៊ើចំនួន ២ ស្លាបព្រាកាហ្វេ យកមកត្រដុសលើបបូរមាត់ ទុកចោលមួយសន្ទុះធំ រួចលាងសម្អាត។ អនុវត្ត ២ ទៅ ៣ ដងក្នុង ១ សប្ដាហ៍។
ប្រភព៖ Zeppfeed
កម្ចាត់បញ្ហាស្បែកស្ងួតសំរាប់រដូវរងារជាមួយនឹងដំណោះស្រាយទាំងនេះ
ក្នុងរដូវរងាស្បែកបុរសនារីគ្រប់រូប តែងតែប្រឈមនឹងភាពស្ងួត តឹង ជ្រីវជ្រួញ បែកស្រកា រមាស់ ស្រគាំ និងងាយឆ្លងជំងឺជាងរដូវផ្សេងៗ ដែលបណ្ដាលមកពីខ្វះសំណើម។
ទាំងបុរស និងនារីឲ្យតែដល់រដូវត្រជាក់ស្ងួតនេះ ម្នាក់ៗតែងតែមានការព្រួយបារម្ភពីសុខភាពស្បែកនូវអាការៈខាងលើ ដោយបង្ខំឲ្យពួកគេស្វះស្វែងរកឡេ ក្រេម ឬម្សៅនានាដើម្បីការពារ។ បើលោកអ្នកមិនចង់ចំណាយថវិកាលើគ្រឿងទាំងនេះទេ អាចប្រើវិធីសាមញ្ញៗខាងក្រោម ដែលត្រូវគេមើលឃើញថាមានប្រសិទ្ធភាពសម្រាប់ស្បែក៖
១. ល្ហុងទុំបិតមុខ
លោកអ្នកគ្រាន់តែចិតល្ហុងទុំជាចំណិតៗមួយកូនចានដោយយកគ្រាប់ចេញ ទៅលាយជាមួយចេកទុំមួយផ្លែ រួមនឹងទឹកឃ្មុំ២ស្លាបព្រាបាយ ច្របល់ចូលគ្នា រួចយកមកលាបផ្ទៃមុខ ឬស្បែកជាការស្រេច។ គុណប្រយោជន៍របស់វា គឺផ្លែឈើទាំងពីរប៉ូវស្បែកកុំឲ្យជ្រីវជ្រួញ ឯទឹកឃ្មុំផ្ដល់សំណើមស្បែកក្រោយលាប វានឹងធ្វើឲ្យស្បែកតឹង ស្រស់ថ្លា និងក្មេងជាងវ័យ។
២. ស៊ុតលឿង និងប្រេងអូលីវ ធ្វើម៉ាស់បិតមុខ
គ្រាន់តែយកស៊ុតផ្នែកលឿង ២គ្រាប់ និងប្រេងអូលីវ ៣ទៅ៤ដំណក់ លាយចូលគ្នាហើយលាបលើស្បែកទុក ២០នាទី រួចលាងទឹកចេញ។ ប្រេងអូលីវសម្បូរទៅដោយសារធាតុប្រឆាំងអុកស៊ីតកម្ម វីតាមីន E និង K ឯស៊ុតលឿងផ្ទុកវីតាមីន A និង lecithins អាចបំប៉នស្បែក និងព្យាបាលស្បែកកុំឲ្យស្ងួតយ៉ាងមានប្រសិទ្ធភាព។ បើគេប្រើល្បាយនេះជាម៉ាស់លាបមុខក្នុងរដូវរងា នោះគេនឹងបានស្បែកភ្លឺរលោងជាទីពេញចិត្ត។
៣. ប្រេងដូង
ប្រើប្រេងដូងតែមួយមុខលាបលើស្បែក និងម៉ាស្សាថ្នមៗ រហូតវាជ្រាបចូលស្បែក នោះវានឹងជួយឲ្យស្បែកទន់ ផ្ដល់សំណើមតាមបែបធម្មជាតិ។ នារដូវរងា អ្នកជំនាញផ្ដល់ដំបូន្មានឲ្យលាបពេលយប់មុនចូលគេង។
៤. ក្រូចឆ្មា និងទឹកឃ្មុំ
ចិតក្រូចឆ្មាជា ២ចំណែក ច្របាច់ចូលជាមួយទឹកឃ្មុំ ២ស្លាបព្រា រួចយកដុំសាឡីជ្រលក់ទៅលាបលើស្បែកទុក ១០នាទី សឹមយកទឹកលាងសម្អាត។ ក្រូចឆ្មាមានផ្ទុកវីតាមីន C ឯទឹកឃ្មុំប្រឆាំងនឹងការរលាក ពេលប្រើរួមគ្នានោះវានឹងជួយកម្ចាត់កមរមាស់កើតមានលើស្បែកយ៉ាងប្រសើរ។
៥. ប្រេងផ្កាឈូករ័ត្ន
យកតែពីរបីដំណក់ លាបលើស្បែកម៉ាស្សាថ្នមៗជាមួយម្រាមដៃ ឲ្យប្រេងជ្រាបចូលស្បែកដោយមិនចាំបាច់លាងសម្អាតទេ។ ប្រេងផ្កាឈូករ័ត្ន ត្រូវគេដឹងថាជាអ្នកជំនាញស្បែកស្ងួត និងផ្ទុកវីតាមីនច្រើនប្រភេទ និងអាស៊ីដខ្លាញ់ ដែលវានឹងជួយឲ្យស្បែកក្មេងជាងវ័យ ថែមទាំងផ្ដល់សំណើម។ វិធីនេះលោកអ្នកអាចសាកល្បងមុនចូលគេង។
៦. ចេកទុំ
យកចេកទុំ ១ ឬ២ផ្លែ លាយជាមួយទឹកឃ្មុំ រួចលាបលើផ្ទៃមុខទុករយៈពេល ១៥ ទៅ២០នាទី សឹមលាងទឹកចេញ។ គុណប្រយោជន៍របស់វា គឺបំប៉នឲ្យស្បែករលោង កម្ចាត់ចោលភាពជ្រីវជ្រួញ និងផ្ដល់សំណើមជាមួយវីតាមីន C, B6 និង A ៕
ប្រភព៖ Stylecraze
វិធីងាយៗ១០យ៉ាង សម្រាប់អ្នកចង់ឲ្យប្រអប់ដៃទន់ស្រឡូន
សម្រាប់សុភាពនារី ជាពិសេសអ្នកដែលធ្វើកិច្ចការងារផ្ទះច្រើន តែងប្រាថ្នាចង់ឲ្យប្រអប់ដៃខ្លួនទន់ស្រឡូនស្អាត និងមានភាពទាក់ទាញ។ តើគួរធ្វើយ៉ាងណាដើម្បីបានដូចបំណង? សូមសាកល្បងវិធីសាស្ត្រសាមញ្ញ ងាយៗ ១០យ៉ាងនេះ៖
១. ឧស្សាហ៍លាងដៃ
ការលាងដៃជាញឹកញាប់មិនត្រឹមតែជួយឲ្យដៃអ្នកស្អាតប៉ុណ្ណោះទេ ថែមទាំងបង្ការអ្នកពីមេរោគបង្កជំងឺផ្សេងៗផងដែរ ហើយគប្បីលាងដៃអ្នកជាមួយទឹកក្ដៅឧណ្ហ៍ៗជាជាងទឹកក្ដៅ ឬទឹកត្រជាក់ពេកដែលនាំឲ្យខូចស្បែកទៅវិញ។
២. ជ្រើសរើសសាប៊ូអោយបានត្រឹមត្រូវ
ជ្រើសរើសប្រើប្រាស់សាប៊ូសម្រាប់លាងដៃដែលមានជាតិគីមីស្រាល ផ្សំពីជ័រតែធម្មជាតិ ឬក្លិនឈើដែលសក្ដិសមសម្រាប់សម្អាតដៃ។
៣. ប្រើឡេលាបផ្ដល់សំណើមដល់ស្បែកដៃ
បន្ទាប់ពីងូតទឹករួច អ្នកអាចប្រើប្រាស់ឡេលាបដែលជួយរក្សាសំណើម និងធ្វើឲ្យស្បែកដៃមានភាពស្រស់ស្អាត។ គប្បីប្រើឡេលាបដែលសក្ដិសមនឹងស្បែកអ្នក។
៤. បញ្ចប់ទម្លាប់ខាំក្រចកដៃ
គួរចៀសវាងទម្លាប់ខាំក្រចកដៃដែលវាក៏ជាបញ្ហាចម្បងដែលបណ្ដាលឲ្យប្រអប់ដៃខូច និងធ្វើឲ្យក្រចកដៃអ្នកក្រហម និងក្រហាយ។
៥. ប្រើប្រេងធម្មជាតិ ឬទឹកឃ្មុំ
ទឹកឃ្មុំមានសមាសធាតុប្រឆាំងមេរោគដែលជួយសម្អាតដៃបានស្អាត។ អ្នកអាចប្រើទឹកឃ្មុំ ម្ដងក្នុងមួយសប្ដាហ៍ លាបថ្នមៗលើដៃ ទុកចោលរយៈពេល ៥ទៅ១០នាទីរួចលាងជម្រះនឹងទឹកក្ដៅឧណ្ណៗ ធ្វើបែបនេះជួយឲ្យស្បែកដៃអ្នកទន់ និងស្រស់ស្អាត។ ម៉្យាងវិញទៀតអ្នកអាចប្រើប្រេងអូលីវមកត្រាំដៃរយៈពេល៥នាទី ដែលវាអាចជួយឲ្យដៃ និងក្រចករបស់អ្នកស្អាត និងមានសំណើម។
៦. ថែទាំស្បែកគល់ក្រចកដៃ
បន្ទាប់ពីងូតទឹករួចអ្នកគួរជូតសម្អាតដៃជាមួយកន្សែងដៃ និងប្រើឡេលាបស្បែកគល់ក្រចកជំនួសឲ្យការកាត់ស្បែកគល់ក្រចកនេះដែលធ្វើឲ្យអ្នកឆ្លងមេរោគ និងធ្វើឲ្យអាក្រក់មើល។
៧. សំអាតប្រអប់ដៃ
សម្រាប់អ្នកចង់ឲ្យស្បែកដៃអ្នកភ្លឺរលោងបន្ថែម អ្នកអាចយកក្រូចឆ្មារយកមកត្រដុសនឹងស្បែកដៃ ដែលនេះជួយបំបាត់ស្នាម និងធ្វើឲ្យស្បែកដៃទន់ ភ្លឺរលោង។
៨. ប្រើប្រេងចាហួយ
អ្នកអាចខាត់ក្រចកដៃឲ្យរលោងដោយលាបប្រេងចាហួយជុំវិញក្រចកដៃ ម៉្យាងទៀតលាបដៃអ្នកនៅមុនពេលចូលគេងដោយពាក់ស្រោមដៃពីលើដែលវាជួយឲ្យប្រអប់ដៃកាន់តែទន់រលោង។
៩. ជៀសវាងទឹកលាងថ្នាំក្រចក
ការប្រើប្រាស់ទឹកថ្នាំលាងក្រចកដែលមានសារជាតិទឹកខ្មេះដើម្បីលាងទឹកថ្នាំក្រចក អាចបណ្ដាលឲ្យក្រចកអ្នកប្រេះបាន។
១០. ប្រើឡេលាបការពារស្បែកដៃពីកម្ដៅថ្ងៃ
ឡេលាបការពារស្បែកដៃពីកម្ដៅថ្ងៃ អាចការពារ និងជួយកាត់បន្ថយភាពចាស់នៃស្បែកដៃរបស់អ្នកបានមួយកម្រិតផងដែរ៕
ប្រភព៖ sabay
ចង់ឲ្យកូនឆ្លាត ស្ត្រីពពោះគួរធ្វើរឿង៧យ៉ាងនេះ
ការមានផ្ទៃពោះ គឺជាពេលវេលាដ៏សំខាន់មួយសម្រាប់ម្ដាយគ្រប់រូបត្រូវផ្ដល់កំណើត ផ្ដល់រាងកាយមាំមួន ខួរក្បាលវ័យឆ្លាតដល់កូនៗ។ ការបរិភោគចំណីអាហារ និងសកម្មភាពប្រចាំថ្ងៃ ជាចំណែកមួយចូលរួមផ្ដល់ភាពវ័យឆ្លាតដល់ក្មេងដែរ បន្ទាប់ពីហ្សែនមានស្រាប់។ តាមរយៈការសិក្សារបស់អ្នកជំនាញនានា បានរកឃើញថា កត្តាទាំង៧ ខាងក្រោមនេះ បានរួមចំណែកធ្វើឲ្យក្មេងមានភាពវ័យឆ្លាតពេលកើតចេញមក៖
១. អានសៀវភៅ
ទោះបីជាក្មេងមិនអាចយល់ពាក្យម្ដាយអានទាំងនោះក្ដី តែការអានរឿងធ្វើឲ្យក្មេងចេះមានអារម្មណ៍ស្ដាប់សូរសំឡេង ហើយក្មេងឆាប់ចាំ។ ជាទូទៅអ្នកគួរដឹងថា នៅត្រីមាសទីបីនៃរយៈពេលពពោះ ទារកអាចស្ដាប់សូរសំឡេង និងចាំបានតិចៗ។ អ្នកម្ដាយត្រូវចាប់ផ្ដើមអានសៀវភៅរឿង កាសែត ឬទស្សនាវដ្ដី ដែលខ្លួនចូលចិត្ត។
២. ឲ្យត្រូវពន្លឺថ្ងៃបានទៀតទាត់
យើងដឹងហើយថា ពន្លឺព្រះអាទិត្យសម្បូរទៅដោយវីតាមីន D ដែលវាមានសារៈសំខាន់ដល់ម្ដាយ និងកូនក្នុងផ្ទៃ។ ជាមធ្យមអ្នកជំនាញណែនាំឲ្យម្ដាយអង្គុយ ឬដេកហាលថ្ងៃឲ្យបានពី ១៥ទៅ២០នាទីរៀងរាល់ថ្ងៃ តែត្រូវប្រយ័ត្នចំពោះស្បែកដែរ គឺមានលាបក្រែមការពារផង។ អត្ថប្រយោជន៍បានមកពីវីតាមីន D របស់ពន្លឺព្រះអាទិត្យ គឺជួយឲ្យឆ្អឹងទារករឹងមាំ និងសុខភាពល្អ។
៣. ម៉ាស្សា ឬអង្អែលថ្នមៗលើពោះ
ប្រសិនបើម្ដាយចង់មានទំនាក់ទំនងជាមួយកូនកាន់តែខ្លាំងបន្ថែមទៀត អ្នកគួរម៉ាស្សា ឬប៉ះស្ទាបពោះថ្មមៗ។ នៅពេលក្មេងមានអាយុចាប់ពី ២០សប្ដាហ៍ឡើងទៅ ក្មេងនឹងអាចចេះមានអារម្មណ៍ពេលប៉ះ ដោយសារប្រព័ន្ធប្រសាទបានវិវឌ្ឍហើយ។ ការស្រាវជ្រាវខ្លះបង្ហាញថា ទារកក្នុងផ្ទៃអាចដឹងពីភាពខុសគ្នារវាងដៃម្ដាយ និងដៃឪពុកពេលស្ទាប។ ពេលម៉ាស្សាទៀតសោត អ្នកគួរប្រើប្រេងឲ្យបានត្រឹមត្រូវ។
៤. ស្ដាប់ ឬច្រៀង ដើម្បីឲ្យទារកមានសុខភាពផ្លូវចិត្តល្អ
នៅពេលអ្នកច្រៀង ស្ដាប់ ឬលេងតន្ត្រី វានឹងធ្វើឲ្យក្មេងអាចផលិតសារធាតុ Serotonin ក្នុងរាងកាយ និងបង្កើតភាពសប្បាយរីករាយរបស់ផ្លូវចិត្ត។
៥. បរិភោគអាហារឲ្យបានត្រឹមត្រូវ
អ្នកអាចទទួលទានអាហារបានគ្រប់ប្រភេទដែលខ្លួនចង់ តែលើកលែងអាហារមានជាតិបារត ដែលជាប្រភេទត្រីសមុទ្រដូចជាត្រីថូណា ត្រីឆ្លាម និងត្រីចំពុះដាវ។ អាហារសំខាន់ជាងគេ ស្ត្រីគួរបរិភោគ បន្លែផ្លែឈើ ត្រី សាច់ ទឹកដោះគោ ស៊ុត ពពួកគ្រាប់ធញ្ញជាតិដូចជា ស្រូវសាឡី អង្ករសំរូប អង្ករធម្មតា ពោត និងអាហារផ្សេងទៀតមានវីតាមីន និងប្រូតេអ៊ីន។
៦. ស្ត្រីមានផ្ទៃពោះគួរធ្វើលំហាត់ប្រាណតាមការណែនាំ
ខណៈពេលពពោះទាំង៩ខែ ស្ត្រីជាម្ដាយមិនគួរធ្វើការធ្ងន់ធ្ងរឲ្យអស់កម្លាំងល្ហិតល្ហៃទេ តែត្រូវធ្វើលំហាត់ប្រាណខ្លះៗ តាមរយៈការដើរចុះឡើងៗ បរិភោគអាហារសុខភាព និងសម្រាកឲ្យបានច្រើន។
៧. ដាច់ខាតមិនត្រូវពិបាកចិត្ត ឬស្ត្រេសទេ
ពេលវេលានេះ ម្ដាយគ្រប់រូបត្រូវចៀសឲ្យផុតពីអារម្មណ៍មួម៉ៅក្ដៅក្រហាយ ស្ត្រេស ឬក្ដីបារម្ភនានា ព្រោះក្មេងអាចនឹងទទួលអារម្មណ៍បែបនេះដែរ។ ចំពោះដំបូន្មានរបស់អ្នកជំនាញ សូមឲ្យម្ដាយត្រូវអត់ធ្មត់ខន្តី តាមរយៈការធ្វើសមាធិ ឬបន្តហាត់យូហ្កាបើធ្លាប់ធ្វើ៕
You must be logged in to post a comment.